特多排“洪”

特多排“洪”

美洲金盃賽B組最後一輪分組賽明早有場實力之戰，洪都拉斯對特立尼達和多巴哥。雖然洪都拉斯兩戰兩勝已經穩入八強，特多則只係一和一負，表現比較失準，但兩隊實力其實唔會相差太遠，甚至乎屬於半斤八両。特多要打入八強，今仗只許成功不許失敗，和波都唔掂，爭勝決心無須多講。初盤洪都拉斯讓平手／半球，受讓的特多值博。

既然洪都拉斯已經有六分肯定出線，唔排除會讓部分主力休戰，留力搏殺打八強淘汰賽，事實上球隊人腳比以往明顯削弱，三名在英超球會效力的柏拉斯奧斯、費古爾路亞及艾斯賓奴沙都不在名單中，戰力無疑有所下降，由於頭兩場對手唔算太強，今仗才係真正考驗。

特立尼達和多巴哥陣中有唔少球星在歐洲搵食，包括步大力雄、衝刺力強，現效力史篤城的K鍾斯、米杜士堡的賀爾迪、葉士域治的愛華士及比甲亨克的希蘭等，整體質素絕對唔比洪都拉斯弱，問題只係能否發揮出本身水準。經過頭兩場失誤檢討後，球隊應有大為改善，許勝不許和形勢下，特多必定誓死一拼。

推介：特立尼達和多巴哥1:0