亞冠：球星如雲乘勝追擊 希拉爾質高大開薩戒_東方日報
玩球网 2025-09-29 00:00:00
| 亞冠盃B組賽事，拿薩夫主場迎戰希拉爾，兩隊實力有距離，烏茲別克球隊拿薩夫上輪首場亞冠盃，大好形勢下輸波，暴露經驗及心理質素欠佳問題。反觀沙特阿拉伯豪門希拉爾球星如雲，預料可以再響勝鼓，但考慮到客勝賠率太熱冇肉食，希拉爾近4場亞冠盃有3次總入球開4球或以上，今場揀3.5球入球大合理。（HOY TV 76台周一晚9時45分直播）文:Mic少 拿薩夫成立39年，上季終於首奪本土頂級聯賽冠軍，整體人腳實力屬於巔峰，但大賽經驗不足，上輪作客另1支沙特球隊吉達艾阿里，放開懷抱豁出去一搏，上半場創造驚喜，一度領先兩球。 拿薩夫大賽經驗不足 不過拿薩夫球員唔識收放，下半場體力不繼，連失4球，倒輸2比4，呢種有前冇後踢法，充滿娛樂性，但往往難以取得佳績。拿薩夫今仗有地利優勢，更加冇理由退縮，預料會繼續主攻，希望搶到分。 由意大利名帥施蒙尼恩沙基執教嘅希拉爾，曾爆冷淘汰曼城，打入今屆世冠盃8強，隊內擁有烏拉圭射手達雲紐尼斯、葡萄牙中場魯賓尼維斯、法國左閘迪奧靴南迪斯等頂級球星，加上馬高斯李安納度、馬爾甘等其他高質素外援，實力高過拿薩夫兩班，上輪亞冠盃亦旗開得勝，以2比1擊敗卡塔爾球隊艾杜哈尼，各項賽事近6場合共轟入13球，要撕破拿薩夫防線，並唔困難。不過，希拉爾防守唔算穩陣，近5場失7球，加上球隊於亞冠盃亦旺大手交易，預料今場亦會多波入。 |