日職：勝利船衝冠蓄細待發_東方日報
玩球网 2025-09-12 00:00:00
| 今日黃昏時段上演3場日職，其中2支爭冠分子更要正面交鋒，神戶勝利船主場硬撼柏雷素爾。衞冕嘅勝利船今季保守到暈，嚟到爭冠關鍵時刻，一定穩陣行先，而且近年碰頭例少交收，大家都想贏又怕輸情況下，唔慌多波入，寧捧2.5球入球細。文:法達斯維 （無綫myTV SUPER周五晚6時直播） 神戶勝利船與柏雷素爾同得53分，僅僅落後榜首京都不死鳥1分，但勝利船因為打多1場比較輸蝕，若果今仗稍有差池，隨時會畀京都不死鳥甩開。雖然早前喺日聯盃出局，勝利船仍有聯賽、日皇盃同亞冠精英盃要爭，識得留放好重要，因此今季踢法上比較保守，就算贏波都係點到即止，各項賽事近9場全開2球或以下，加上近5場聯賽贏得2場，狀態麻麻下必定小心為上。 柏雷素爾亦要應付聯賽同日聯盃兩條戰線，各項賽事近9場獲7勝2負，弗到漏油。不過佢哋客場表現打折扣，單計之前5場聯賽作客只得2勝1和2負，其中近2場先後輸畀鹿島鹿角同岡山綠雉，可勝不穩。睇埋柏雷素爾近年鬥勝利船較少贏波，今仗唔敢輕舉妄動，近7次碰頭有6次開2球或以下，捧入球細好過。 不死鳥勇銳受讓筍 另一場焦點戰，榜首京都不死鳥作客「6哥」廣島三箭，不死鳥挾聯賽4連勝、近4次交手獲3勝1負之勢，讓球主客和仲有得受讓咁筍，讓球客勝（+1）咪錯過。 |