拉科難“達”三分

拉科難“達”三分

拉科魯尼亞與切爾達都算難兄難弟，今季齊齊升班上西甲，可惜踢咗大半季仍毫無作為，兩兄弟在聯賽榜包尾，隨時齊上齊落返乙組“開工”。今晚兩隊碰頭上演榜尾大戰，都要垂死掙扎搶分自保，海軍鬥水兵，實力屬半斤八両，要分出勝負實在難料，和波最正路。初盤拉科魯尼亞讓平手／半球，皆因有主場之利，但勝算亦唔大，可捧受讓的切爾達。

廿七場聯賽只得十七分，拉科魯尼亞護級形勢相當惡劣，基本上打定輸數，有心理準備降回乙組比賽。球隊實力未夠班，球員狀態又不足，近九戰只係兩和七負，上仗對巴塞竟然射門零中目標，聯賽共失五十八球，攻力有限兼防守脆弱不堪。雖然今仗對手級數唔同，但根本缺乏贏波本錢，陣中首席射手攻入十球的列基及中後場主力卡斯特路繼續因傷缺陣，陣容不整，要攞足三分都難。

切爾達亦唔好得去邊，尤其作客戰績簡直差到冇朋友，聯賽只係一勝一和十二負，今仗贏波信心近乎零，只不過拉科又係咁上下，一於和波攬住死。

推介：和波一比一