世冠盃：國米河床聯手開半大_東方日報
玩球网 2025-06-25 00:00:00
| 世冠盃E組尾輪榜首大戰，國際米蘭硬撼河床。依家積分榜形勢微妙，國際米蘭同河床今仗只要大比數打和，就會攜手出線，河床最鍾意一開波即嚟料，咁搶韁一於捧1.5球半場大。 （周四早上9時開賽）文:法達斯維 先講講E組形勢，河床與國米同得4分排第1、2位，蒙特雷則以2分排第3，包尾嘅浦和紅鑽0分肯定出局。由於世冠盃先計對賽，河床與國米之前對住蒙特雷均打和，比數係0比0同1比1，假設國際米蘭與河床打和2比2或以上，而蒙特雷贏紅鑽，大家都獲5分，對賽總得分、對賽得失球差一樣下，再計對賽較多入球，到時國米同河床對賽入波便多過蒙特雷，可以夾計踢走蒙特雷。 國際米蘭雖有新帥捷禾上任，但似乎仍未走出歐聯決賽慘敗陰霾，喺世冠盃首輪打和蒙特雷，次輪幾經辛苦先至反勝浦和紅鑽，表現未如理想，加上近期經常失波，一眾後衞踢到患得患失。唯一慶幸嘅係，國米隊長拿達路馬天尼斯有回勇迹象，連續2場世冠盃都有士哥，重拾信心。 大比數和波可齊齊出線 另邊廂，河床今屆頭2輪同錄1勝1和，不過中場奇雲卡斯坦奴上場鬥蒙特雷做咗「紅牌阿姑」，今場要坐波監，冇咗佢做掃蕩，防守方面點都爭啲。呢支阿甲班霸惟有先發制人，佢哋各項賽事近10場，有7次半場開2球或以上，既然雙方都要爭取對賽較多入球，隨時一開波就會搶攻，駁火味濃，捧1.5球嘅半場大最上算。 |