曼聯作客難穩勝

曼聯作客難穩勝

英超上演“首尾”之戰，“一哥”曼聯將作客昆士柏流浪，贏波似乎毫無懸念，但波係圓嘅，爆冷戰果經常出現，何況昆士柏流浪已去到走投無路之地，垂死掙扎拼輸嚟打，話唔定會踢出意外驚喜。即使輸，都要輸得好好睇睇，唔希望在主場慘敗輸到面目無光。

曼聯目前真係大把貨，領先死對頭曼城十二分，榜首之位穩如泰山。當然，落到場比賽冇話留有餘地，只係拼搏程度去到邊，相信“費爵爺”重點之戰將集中在歐冠對皇馬的生死戰，雲佩斯與朗尼等主力千祈要完完整整唔好有傷。初盤曼聯讓一球／球半，博昆士柏流浪贏盤。

打波冇話輸硬，最緊要知恥近乎勇，唔好忘記昆士柏曾經作客贏車路士，主場和曼城與熱刺，並非想像中的超級魚腩。一月中更加入利美、森巴、賓夏姆及韓國新星尹錫榮，前中後實力得到提升，今仗有望搶得一分。

曼聯目前兵強馬壯，“費爵爺”有足夠人腳調動，只不過近四場作客唔算突出，只係一球險勝富咸，其餘三場都係和波，讓過一球的確唔划算。

推介：和波2：2