森巴讓多小心碰“克”

森巴讓多小心碰“克”

世界盃決賽周正式開火，明晨四點揭幕戰由巴西對克羅地亞打頭陣。貴為東道主，又係奪標大熱，兼實力強橫，森巴兵團要飲“頭啖湯”應該冇甩拖。不過初盤開出巴西要硬讓球半，似乎有一定暗湧。皆因克羅地亞並非善男信女，陣中不乏好波之人，個人技術質素相當平均，而且踢法屬於細膩一族，對住強勁嘅巴西，必會穩守為主。巴西要淨勝兩球未必易如反掌，不妨考慮“格仔兵”輸波贏盤。

決賽周前巴西踢過兩場熱身賽，首先四球大勝巴拿馬，由於對手實力問題，巴西根本受唔到任何威脅，球員發揮自然為所欲為。第二場對住防守較為穩健嘅塞爾維亞，森巴兵團鋒力明顯受到牽制，全場只得三次中目標射門，結果只能一球小勝，防線亦幾乎被“塞軍”偷襲得手，反映巴西亦有一定隱憂。今戰對住與“塞軍”踢法非常接近，甚至有過之而無不及嘅克羅地亞，巴西實在難以大勝。

由摩特歷、拿傑迪、文迪蘇傑、謝拉域、柏拉積及哥魯卡等領軍嘅“格仔兵”有前有後，首場挑戰主辦國，定必嚴陣以待，但求不敗為目標。

推介：巴西2:1