今日捧非洲孖寶

今日捧非洲孖寶

今日繼續推介兩場熱身賽，先有亞洲太極虎韓國主場迎戰非洲突尼斯，相信係針對決賽周同組對手阿爾及利亞，目的了解非洲球隊踢法。

韓國廿三人名單當中，只有六名“土炮”球員，其餘都係外流球星，包括三名在中超効力嘅金英權、河大成及朴鍾佑，當然唔少得李青龍、寄誠庸、朴主永及孫弘民等重心主力。以人腳嚟講，似乎攻強守弱，難怪近三場友賽只得一勝兩負，兩場敗仗淨吞墨西哥與美國六蛋，防線確需要改善。

突尼斯雖然未能殺入決賽周，但如果講到整體實力，與韓國唔會有太大差距，只係輸蝕在踢作客，只要認真作戰，韓國未必贏硬對手。初盤韓國讓半球／一球，捧突尼斯可抗“韓”潮。

另一支決賽周的非洲球隊尼日利亞將在中立場與蘇格蘭交手。呢隊真正非洲鷹陣中有唔少在英超搵食球星，包括米基、摩西斯、奧丹維治及艾美奧比，踢得英超當然有一定質素，無論講體力、技術及組織性，無疑都比起只識高Q大棍、踢法較粗糙嘅蘇格蘭優勝。初盤尼日利亞只讓平手／半球，簡直超筍盤。

推介：韓國和1:1