馬體會雖敗猶榮

馬體會雖敗猶榮

天堂與地獄只係一線之間，又或者只係兩分鐘時間。講緊係昨晨場歐冠決戰，馬體會喺補時兼完場前兩分鐘被皇馬追和，更在加時兵敗如山倒，最終與獎盃擦肩而過。

不論成與敗，馬體會在法定時間內，整體表現的確比皇馬較佳，由開波一刻起，根本完全未驚過對手，更令到皇馬越踢越驚。但足球比賽就係充滿變數，正如英超升班附加賽，打比一直狂攻昆士柏流浪，最慘又係“臨尾香”，踢得好一隊往往未必成為最終勝利者。

皇馬發揮確受制於馬體會嘅埋身緊迫踢法，但又唔可以抹殺皇馬力追到底決心。勝者為王，敗者為寇，馬體會唯有俯首稱臣。

講開呢場決賽，好多波友又有唔少陰謀論，一早就收到一位老友微信，內容只有三个字，“打假波”再加三個憤怒公仔圖案，相信意思係指皇馬先殺盤後殺波。冇錯，足球係人為，唔排除有打假事件。不過場波真係假的話，就真要佩服一班球員嘅演技，“發哥”都要行埋一邊。

真的假不了，假的真不了，正所謂健康睇波，千祈唔好太過“投”入，最重要可以欣賞到一場精彩球賽。