巴塞失敗之謎

巴塞失敗之謎

經過跨年漫天戰火後，今季歐洲五大聯賽已曲終人散，如果要數最失敗球會，非英超曼聯莫屬，不但取得自英超以來最差成績，連歐戰亦無緣参與，名利雙失兼損失慘重，似乎下季大變動係事在必行。

至於另一支最令“粉絲”失望嘅就係巴塞羅那，兩三年前可以話雄霸歐洲球壇，更被譽為地上最強，可惜今季變成“三失”球會，只得一個安慰獎——西班牙超級盃，對球迷嚟講根本唔收貨，剩係在魯營球場將西甲冠軍獎盃拱手相讓畀馬體會，已經傷盡唔少“巴粉”的心。

其實巴塞開始失去霸氣，主要有三大原因，首先球員年紀漸趨老化，沙維、恩尼斯達、佩魯爾、馬斯卓蘭奴及艾華斯等重心球員已年過三十，在現今足球講求體能趨勢下，點可能長期保持最佳水準。

第二，整體踢法長年不變，雖然今季有馬天奴執教，但球隊踢法根本冇太大變化，依然仿效“哥帥”模式，明顯已被唔少老對手破解。最後就係球員戰意及鬥心問題，好簡單，一個美斯足以影響球隊整體戰鬥力，成也敗也。

無論如何，巴塞與曼聯都係世界頂級球會，相信唔少球迷仍然期待“雙雄”下季重振雄風。