韋根難破“浪”

韋根難破“浪”

曼城順風順水在主場大勝維拉後，重奪英超冠軍高唱入雲，只要周日煞科戰唔畀“鎚仔幫”扑倒，就可以第二度雄霸英超。雖然球場上千變萬化，乜嘢事都會發生，但以曼城主場氣勢及強大實力，“鎚仔幫”要爆大冷贏波，可能性微乎其微。所以預先祝賀曼城上上下下所有職球員，恭喜！恭喜！

新特蘭同樣擊退對手，宣佈護級成功。諾域冶、富咸及卡迪夫城成為不幸者，下季就要轉戰英冠，今季英超爭逐應該都算告一段落。

講開英冠，明晨繼續有場升班附加賽首回合，由韋根對昆士柏流浪，呢兩班波真係難兄難弟，上季齊齊由英超降落英冠。今時今日兩兄弟又要互撼爭一個升班機會，唔係你死就係我亡，兩回合肯定殺得激烈。

其實兩隊踢法大同小異，同樣以爛打見稱，當中亦粗中帶幼。如果講到球員平均質素與經驗，昆士柏流浪有賓拿約安、卡蘭積卡、奧奴夏及奇雲杜尼等身經百戰球星，明顯稍勝一籌，只係作客輸蝕小小。初盤韋根要讓平手／半球，必揀受讓嘅昆士柏流浪可以上“韋”。

推介：昆士柏流浪1:0