曼城讓多難“維”數

曼城讓多難“維”數

昨晨有睇水晶宮對利物浦，場波認真峰迴路轉。勢估唔到紅軍領先三球大好形勢下，竟然被水晶宮班“蝦兵蟹將”搞亂檔攤，令爭標機會變得更渺茫。

所謂貪勝不知輸，紅軍統帥羅渣士今場波的確失敗，三球在手仲要狂攻對手追球數，搞到後防變成蔡楓華名曲——“絕對空虛”。唔好忘記與曼城相差九球，只得一兩場波去追，根本唔係一個小數目，攞三分其實最實際。最終斷送大好前程，不單止“蘇七”喊到收唔到聲，更令所有“紅粉”心痛欲絕。不過世事無絕對，和尚也媾女，足球比賽乜事都可能發生，話唔定曼城今晚對維拉又出現意外戰果。

講真一句，曼城在主場取得十五勝一和一負佳績，維拉要做攔路虎又談何容易。雖然首循環曼城作客曾經輸過畀維拉，但目前在奪冠緊要關頭，“藍月亮”又點會放過大好機會，必定傾盡全力殺退對手，向錦標再邁進一大步。

維拉今仗只係踢“交差波”，唔同水晶宮要向主場球迷交代，阻人搵食猶如殺人父母，維拉又點會咁絕。不過輸還輸，都要輸得好好睇睇。初盤曼城硬讓兩球半，唔需再計球數嘅曼城只要三分就已經足夠，想贏盤不妨揀維拉。

推介：曼城2:0