阿仙奴讓主放心扑「鎚」

阿仙奴讓主放心扑「鎚」

周二英超獨腳戲，阿仙奴同韋斯咸合演倫敦打吡戰，雖然兵工廠踢完足總盃冇耐，不過佢哋已跌出聯賽前4，為免下屆冇得玩歐聯，今晚勢必傾全力攞3分，2.02倍嘅「讓主」放心扑「鎚」！（周二12，now621台周三2:45am直播）

阿仙奴近5場比賽未贏過，上周雖然喺足總盃4強淘汰韋根闖入決賽，不過都係要捱到射12碼階段先至了結對手，電視播真人Show押後惹嚟觀眾投訴之餘，前曼聯名將堅尼更恥笑兵工廠球員仲有面慶祝，真係未見過有球隊晉級可以咁樣衰，不過呢隻沉睡嘅獅子應該瞓夠喇，因為睇睇個聯賽榜，原來愛華頓已經爬過頭進佔前4，暫列第5嘅阿仙奴如果唔想下屆冇得踢歐聯，損失天文數字收入，最後直路就要落足心機。

靠藍斯基奧特救主

韋舒亞、奧斯爾、哥斯尼同埋禾確特等人繼續倦勤，而法米尼就停賽，好在艾朗藍斯已經復出，回歸正選有望加強阿仙奴攻力，另外基奧特喺足總盃只係後備登場，體能上夠晒儲備，只要發揮正常水準，呢位法國射手有權幫球隊數糊。

韋斯咸多主力受傷

韋斯咸上輪聯賽以1:2不敵利物浦，兩連勝走勢告終，雖然長期傷兵祖爾奧拜恩已經復操，但狀態未足以應付90分鐘賽事，另外占士哥連斯、佐治麥卡尼同埋波里路就肯定倦勤，傳聞指隊長路蘭亦有傷在身，披甲機會低於五成，若然屬實嘅話，韋斯咸嘅勝算更低，爆冷機會更微。
睇番往績，阿仙奴近5次喺主場對韋斯咸獲4勝一和不敗佳績，呢5場波加埋只失一球，上屆喺酋長球場就大勝5:1，建功者包括今場會列陣嘅辛迪卡索拉、基奧特同埋普多斯基，若然不分主客計近6次交手成績，兵工廠亦以獲得全勝佳績，格食格味道好濃，所以呢場倫敦打吡戰唔使諗咁多，放心捧阿仙奴嘅2.02倍「讓主」，另押多注1.62倍入球大亦無妨。