國米讓和「利」潤豐厚



國米讓和「利」潤豐厚

拜仁喺德甲已經奪冠，睇怕跟住都到祖雲達斯攞意甲，而呢個聯賽除咗頭3名大定外，第4、5兩個歐霸席位之爭，似乎都已經成為餘下賽程最大看點；當中喺季初打得好好嘅國際米蘭，經過季中低潮期近仗已越趨穩定，對上8戰只輸一場，今晚作客護級份子利禾奴應有權小勝，捧「讓和」。（周一10，無綫網絡電視301頻道周二3:00am直播）

國米自有新班主上場後，明顯有心大搞，未完球季己張揚會招攬尼曼查維迪，其餘仍有數名球星傾緊，似乎都真係振奮到球員士氣，對上8場賽事，球隊共取得4勝3和，當中仲係作客贏過費倫打和羅馬，表現絕對唔講得笑，更重要係幾名射手近期腳風頗順，更係最有力贏波本錢。
利禾奴今季只贏過5場，主場佔4場，表面上今場唔太落下風，不過計真啲佢哋贏嘅都只係中下游對手，輸波率亦好高，當中對帕爾馬、羅馬等有攻力球隊都輸兩球以上，國米今季出名火力足，利禾奴敗象早呈；唯一要留意國米自12月以嚟所有勝仗，只有一場贏兩球以上，呢場信國米會贏，但既然數據咁靚，捧「讓和」都不為過。
另外早場烏甸尼斯對卡坦尼亞，烏甸尼斯有迪拿達利臨退休發威，對上4戰贏兩場，分別喺主場贏A米及薩斯索羅，都係靠呢名射手一球搞掂對手，今晚又喺主場對下游隊，盤口上讓半一，絕對係坐半格等食全格。（周一1，無綫網絡電視301頻道周二3:00am直播）