黑貓上盤雄材韋略

黑貓上盤雄材韋略

英超周一晚上演護級大戰，已經6場冇贏過嘅新特蘭將主場迎戰韋斯咸。表面上「黑貓」毫無優勢可言，但事實係普耶領軍下球隊甚有鬥志，上場作客紅軍都只僅敗，相對韋斯咸將近上岸略為心散，今場主隊讓平半，上盤必為此獨腳戲首選。（周一9，now621台周二3:00am直播）

韋斯咸領隊艾拿戴斯當選2月份最佳領隊，當中5場聯賽攞到4勝1和，須知呢名教頭向來都好「知足」，向上望更非佢所長，果然攞到一定積分後球隊又連輸3場，上場返到主場對中游份子侯城，趁對手打少一人又執多3分，依家已有34分喺手，如果如大Sam所言有37分就夠上岸嘅話，餘下賽程都相當輕鬆。
除咗懷疑韋斯咸今場爭勝鬥志之外，數據上都證明韋斯咸今戰毫無甜頭，佢哋今季所有聯賽作客賽事，分別只贏過3場，打和4場，其餘輸足8場，當中對富咸、諾域治等球隊都輸，足證呢隊波作客都打低幾皮，加上後防大將哥連斯受傷，今場要守住一定狂攻嘅新特蘭唔易。
新特蘭喺普耶帶隊下，做到邊護級邊打盃，最後聯賽盃決賽輸俾曼城，足總盃8強出局已有晒交待；表面上，佢哋喺兩項盃賽出局後成績未有即時好轉，但原因唔係發揮欠佳，只係對上3戰，佢哋有兩場要作客，而主場一戰賽和近況不俗嘅水晶宮，再向前回溯，佢哋近8場主場賽事只不敵侯城，可見球隊喺普耶帶隊下發揮其實相當穩定，尤其上場作客紅軍，尾段換入寄誠庸等後，最後15分鐘反客為主嘅攻勢，足以令利物浦痛失兩分，如呢股氣勢帶到今場對韋斯咸，新特蘭今晚要取得入波更係易如反掌。

新特蘭上季雙殺對手

韋斯咸喺2011年球季曾降班，但就算數到2010年，新特蘭喺對上5次聯賽對碰都未輸過俾韋斯咸，主場更連續兩次擊敗對手，頗有格食格味道，結合以上數據，呢場新特蘭主場讓平半可能嫌讓得少添！