曼城爆“廠”冇得頂

曼城爆“廠”冇得頂

英超今晚又有重頭戲，爭標形勢轉弱嘅阿仙奴必要力保前四位置，但在酋長球場迎戰走勢強橫嘅曼城，要搶分依然毫無把握，皆因今季對住列強戰績差強人意，首循環被藍月亮打到“一仆一碌”，今仗能夠攞得一分都當贏。

歐冠盃出局之後，曼城可以專心爭奪英超冠軍，近三場聯賽全勝兼攻入十球，防線一球不失，周中更打到專害人“筆錢”嘅曼聯落花流水。球隊狀態“弗”到“嘭嘭聲”，今晚再炒兵工廠亦不足為奇。初盤曼城讓半球，捧藍月亮有“仙”機。

阿仙奴上仗對史雲斯唔衰攞嚟衰，完場前法米尼一個“烏龍波”令球隊痛失兩分，爭標機會接近幻滅，搞到雲總也謝了。事實上防線確要認真檢討，兩場波共失八球，對車仔一戰簡直中門大開，試問今晚又點頂得住曼城強大火力。

曼城雖然少車仔三分，但打少兩場，其實係失分最少一隊，形勢比車仔更好。不過需要過完一關又一關，呢方面最緊要士氣十足，只要今晚成功擊倒對手，球隊可繼續保持強勁走勢。有信心曼城繼雙殺曼聯後，再連環爆“廠”。

推介：曼城3:1