巴塞唔怕“皇”氣

巴塞唔怕“皇”氣

好波一場接一場，尋晚睇完場英超倫敦內戰，明晨四點又輪到西甲國家打吡，皇家馬德里激戰巴塞羅那。的確兩隊真正打甩髀，亦係當今世上兩大球王──“C朗”與美斯再度“埋牙”，捱眼瞓都要睇直播。

皇馬目前領先巴塞四分，只要今晚攪掂對手，基本上已先剷除一大勁敵，即使和波依然優勢存在，所以今仗除與巴塞肉搏之外，亦會加強防守能力，始終美斯、尼馬、費比加斯及山齊士等進攻威力相當銳利，屬於極度危險人物，隨時防不勝防。當然，皇馬嘅“BBC”組合巴利、賓森馬及C朗亦係殺人於無形，與巴塞對攻，一樣未驚過。

兩隊踢法各有所長，皇馬以快攻為殺着，利用兩邊側擊撕破對手；巴塞主要控球為主，進攻模式比較迂迴，但滲透力十足。既然兩隊“突攻隊”都係殺傷力無比，相信會有一定嘅入球數字，至於誰勝誰負實在難料。初盤皇家馬德里讓平手／半球，推介巴塞羅那作客一樣可以“馬”到功成。

推介：和波2:2