曼城連“根”拔

曼城連“根”拔

真係不是冤家不聚頭，上季足總盃決賽，韋根爆大冷擊敗豪門曼城奪得冠軍。可惜球隊難逃降班厄運，今季跌落英冠比賽，但點避都避唔到曼城嘅復仇狙擊。之前雙方在聯賽盃碰頭，曼城只係半力出戰，已經打到韋根落花流水。今晚足總盃八強，韋根又再重臨慘痛之地，睇怕再一次落得被大炒命運。

曼城乘勝追擊，捧走聯賽盃後，繼續向四冠王目標進發。足總盃八強當中，曼城無疑成為奪標頂頭大熱，超勁主場戰績，再加無限火力，今仗料會在自己地頭大開殺戒。初盤曼城讓兩球／兩球半，讓得唔算多兼合情合理，低兩班嘅韋根應該毫無還擊之力，肯定被“藍月亮”曬死。

睇返兩隊上場在聯賽盃對戰統計，曼城全場廿四次攻門十二中，韋根只得三射零中目標，結果曼城不用吹灰之力大勝五球。當時有大衛施華、阿古路及拿斯尼等部分主力休戰，耶耶杜尼、拿華斯與尼格度都係踢後備，“係咁意”都殺到對手血肉模糊，今仗再加強人馬，韋根輸唔過三球當和。

降班之後，韋根整體人腳明顯轉弱，在英冠踢作客更加輸多過贏，想重溫當日溫布萊美夢，發夢冇咁早。推介：曼城5:0