紅魔借“斯”還魂

紅魔借“斯”還魂

一連兩晚又有歐冠睇，今晚仲分“頭尾圍”兩段時間開戰，一口氣可以睇晒兩場直播，正！。

當然關心係尾場曼聯作客奧林比亞高斯，“紅魔”既然在國內錦標經已全部“冚旗”，唯有希望在歐冠大發圍，奧林比亞高斯在歐洲足壇唔算“猛料”，而且以雙方實力比較，曼聯無疑稍勝一籌，只係近況確係麻麻，整體發揮又欠缺暢順，但只要球隊踢出應有水準，要擊敗奧林比亞高斯應該問題不大，初盤曼聯讓平手/半球，一定撐“莫生”，始終紅魔鬼係“高”啲。

奧林比亞高斯都算“巴閉”，因為歐洲足協官網剛公佈，呢支希臘班霸原來係今季全歐洲防守最佳球隊，至今希甲廿六場聯賽只失九球，叫做冠絕全“歐”，但講真一句，希臘足球水準與歐洲五大聯賽相比，明顯次一級，希甲又有幾多個頂級射手効力？今晚又睇吓奧林比亞高斯呢條被稱為“孤寒”防線，點樣可以頂得住紅魔嘅“雲朗配”。

曼聯上場聯賽擊敗水晶宮，贏波自然重要，但最重要係可以加強球隊士氣及信心，因為呢個時期對“莫生”固然更加重要；此外，朗尼成功續約，正選主力又相繼復出，喜事重重，紅魔係時候復活。

推介：曼聯1：0