AC讓多“博”唔過

AC讓多“博”唔過

AC米蘭今季在意甲成績大幅下跌，踢咗半季有多，暫時祇能排第十一位，與榜首祖雲達斯相差成倍分數，爭標肯定唔使諗，就算要追前四，亦差十幾廿分。

AC今季認真失敗，既然高不成低不就、爭標又冇份，又不愁降班，餘下賽事分分鐘游手好閒，更會將戰鬥力集中於歐冠盃，下周中十六強首回合將要迎戰西甲勁旅馬體會，AC主場非勝不可，今晚場聯賽應避重就輕，唔排除祇派出副選上陣；相反，博洛尼亞在下游位置掙扎，護級仍未脫離危險期，搶分慾望一定比AC更強，呢班爛仔波踢法硬朗兼腳腳七注，需明哲保身嘅AC都咪話唔驚。初盤AC米蘭硬讓球半，揀下盤博洛尼亞。

計人腳，AC真係唔差，國腳級球星亦唔少，可惜整體發揮未夠突出，而且欠拼勁及鬥心，可能因球員錫身問題，聯賽已處於放棄態度，留力歐冠在所難免，今仗要大勝對手實在唔易，至多贏波輸盤。五場不勝嘅博洛尼亞上仗終於反彈，作客二比一擊敗拖連奴，可加強今仗士氣，搶一分唔難。

推介：和波一比一