病“魔”唔怕槍手

病“魔”唔怕槍手

阿仙奴上場聯賽再遭滑鐵盧，一比五慘敗紅軍腳下，係繼輸畀曼城之後又一場恥辱，仲搞到“雲總”呢位老人家唔小心“仆街”。

老實講句，講醜，小弟覺得曼聯仲醜過阿仙奴，自己地頭贏唔到排包尾嘅富咸，和波已經當輸。兵工廠至少仍穩坐三甲位置；至於紅魔，下季踢唔踢到歐戰都成問題。講還講，今晚兩隊又碰頭，睇吓邊隊可以踢返場爭氣波。

上半場二十分鐘失四球，阿仙奴的確被利物浦殺個措手不及，導致陣腳大亂，防線更加要值得檢討，尤其在死球方面，絕對係最大致命傷。但另一數據，兵工廠目前係主場失球最少一隊，主場十二戰只失六球，希望今場大戰亦可保持呢個優勢。此外，對阿仙奴仲有幾種不利因素，例如大敗之後球隊士氣；近五次對曼聯只得一和四負，對賽心理處下風；以及接着再對利物浦與拜仁兩場大戰，對部署亦有一定影響；仲有今季對住勁敵都係處於劣勢，隱憂的確唔少。

你話曼聯對富咸打得差又唔係，全場圍攻對手，超過三十次以上射門，贏唔到又係防守問題。一物治一物，紅魔對住槍手應該有計，何況初盤受讓半球！就算衰多次都要揀曼聯。

推介：和波2:2