望紅魔“富”貴

望紅魔“富”貴

英超今晚有兩場好戲，頭場有實力之戰熱刺對愛華頓，尾場由曼聯對富咸。由於“紅粉”實在太多，所以揀咗尾場推介畀大家。

以賭仔嚟講，曼聯今季真係害人“筆錢”。唔係！應該講係莫耶斯害先啱，令捧場客損失唔少。今晚對住包尾嘅富咸，曼聯真係唔贏冇得贏。

富咸一樣衰到貼地，踢完廿四輪只得十九分，護級形勢十萬告急，餘下每場比賽都要搏命搶分，今仗亦毫無選擇，只有死拼才會贏。但講真一句，以球隊目前士氣和狀態，要在奧脫福殺出條血路，的確相當困難，紅魔今場真係冇得輸。初盤曼聯讓球半／兩球，希望一班“魔星”生生性性，可以大“富”大貴。

根據英媒足球報章統計，莫帥今季帶領曼聯出賽，變陣共八十三次，中場配搭有十三個不同組合，變法仲多過齊天大聖。球隊有如此戰績，真係畀莫帥搞到唔清唔楚。目前人腳總算齊齊整整，只要球員有所發揮，應該要打返場好波。

富咸啱啱簽入多件雷霆救兵，但質素唔算頂級，又要時間磨合。況且已失五十三球嘅脆弱防線，又點頂得住紅魔。

推介：曼聯4:0