車路士成大熱

車路士成大熱

英超第廿四輪嘅矚目大戰，曼城與車仔強者對陣，結果摩連奴以針對性嘅戰術運用及精密部署，打敗有“智利工程師”之稱嘅柏歷連尼所帶領的曼城，柏蛇對住老摩真係冇晒符，因為兩大教頭對碰九次，柏蛇只贏過一場，其餘八場係一和七負，確要向老摩寫個“服”字。

事實上，老摩的確贏得精彩，鐵桶陣式防守踢法，配以簡單直接反撃戰術，令曼城大亂陣腳。若非伊圖、馬迪及卡希爾先後中柱，曼城點只一球落敗。未踢之前，曼城主場強勢真係勁到爆，連續二十場保持不敗金身，今季聯賽十一場全勝未逢敵手，阿仙奴、曼聯、利物浦及熱刺都要俯首稱臣，相信好多球評家冇諗過曼城會在自己地頭，成為“車”下亡魂。小弟真係要講一句，摩連奴你簡直係我偶像。

英超目前三強鼎立，阿仙奴多得車仔打敗曼城，可以重登榜首。下半季連場惡戰，包括作客利物浦、熱刺及車仔，仲有主場對曼市雙雄，要笑到最後的確唔易。反而雙殺曼城嘅車仔形勢最有利，只係作客利物浦較為難踢，最強對手只剩熱刺與阿仙奴，但主場出擊相當有利，車仔已成奪標大熱。