富咸“菲”勝不可

富咸“菲”勝不可

富咸在英超越踢越沉，位置更跌到最低點“包尾”，護級形勢相當惡劣，當務之急非要力挽狂瀾不可，足總盃能否過關只係其次，最緊要英超位置可以保命。所以今晚場足總盃重賽，對住低兩級英甲球隊錫菲聯，唔係晉級問題，而係要贏波加強球隊士氣，今戰非勝不可。

廿四支英甲球隊中，錫菲聯目前排尾二，下季分分鐘降多級踢乙組，可想而知呢班波有料極有限，富咸今仗贏唔到真係當輸。初盤富咸讓半球／一球，坐收半個盤應該冇走雞，但所謂一不做、二不休，推介富咸三球波膽照收。

上場聯賽輸埋畀新特蘭後，富咸開始危在旦夕，馬年即刻拖行馬，一日之內揾咗賀治比、希丁加、東尼基夫、基域斯特及破球會轉會費最高紀錄簽入希臘國腳米祖路，戰力肯定得到提升，相信今仗亦會小試牛刀，盡快適應球隊踢法，整定錫菲聯唔好彩。

錫菲聯在英甲聯賽十四場作客只贏過一場、和三場、輸足十場，作客完全毫無作為，上仗主場對富咸遭狂攻，射門次數達廿五次，唔輸都算好彩仲可以打多場，不過過到初一，過唔到十五。

推介：富咸3:0