紅魔“篤”定開門紅

紅魔“篤”定開門紅

馬達一到，即刻攻到城，呢位西班牙“發電機”果然好腳頭，協助曼聯擊敗卡迪夫城。當然，有朗尼與雲佩斯復出，“紅魔”威力必然增強唔少，乘勝追擊，曼聯今晚作客史篤城，誓要再下一“城”。

史篤城一向踢主場比較惡，惜球隊近期表現仲差過對手“紅魔”多多聲，整體狀態完全陷於低潮，對住開始回勇嘅曼聯，主場亦未必惡得出樣。初盤曼聯讓一球，新年流流，當然揀“紅噹噹”嘅曼聯，包各位波友“紅”運當頭。

史篤城近況跌得非常勁，近八戰輸咗六場和一場，只係在足總盃打敗英冠球隊李斯特城；最慘周中聯賽輸埋畀護級嘅新特蘭，搞到跌落降班漩渦，護級壓力增加唔少。球隊更有侯夫及艾法寧頓等傷兵，中場硬漢尼桑斯今仗又要停賽，戰力減弱情況下，主場縱受讓亦不宜睇好。

“紅魔”首要目標係要爭返上前四，暫時只係差“阿四”嘅利物浦六分，話多唔多，所以必須全面發力。馬達首仗表現相當出色，四十五次成功傳送，包括四次具威脅及一個助攻，完全啱晒曼聯踢法，加上兩大殺手回歸，“紅魔”返嚟啦。

推介：曼聯3:1