曼城“屈”機易過借火

曼城“屈”機易過借火

英超列強再戰足總盃第四圈，周六晚雖未見同級內訌，但曼城勢演入球騷依然有睇頭，低一班的屈福特注定受死。利物浦同樣遇上英冠分子，留力到訪般尼茅夫仍需步步為營。

曼城擁英超、以至歐洲最強火力，面對廿五天內第九場比賽仍未見腳軟，反而殺得性起，周中在聯賽盃四強兩回合共九蛋淘汰韋斯咸，聯賽近兩仗又殺史雲斯及紐卡素，上周在足總盃狂灌布力般流浪五球，表現神勇。以曼城的強陣，就算領隊柏歷連尼今仗輪換，“三鋒”阿古路、尼格度及迪施高均有佳態，要殺英冠屈福特亦易過借火。柏帥豪言：“曼城不單要取得入球，還要贏得所有比賽。”

紅軍留力唔怕“茅”

利物浦下周迎來英超的同市打吡鬥愛華頓，領隊羅渣士暗示，足總盃到訪英冠中下游的般尼茅夫或會留力，但賽前操練仍見謝拉特、史杜歷治等擔大旗，預料正選披甲，保持一定爭勝本錢。不過羅渣士證實兩大將長休：“格倫莊遜早已傷患纏身，現階段無法為他訂下復出期。還有上仗受傷的盧卡斯，應該要養傷幾個月。”

愛華頓、史雲斯，及剛剛殺入聯賽盃決賽的新特蘭分途出擊，對手全是實力最少低一班的弱旅，如無意外晉級在望。