藍戰士謀“利”

藍戰士謀“利”

早幾日先踩完英超球證執法水平差到痹，話口未完前日場“藍紅”大戰、曼城對利物浦負責吹雞嘅麥臣先生又吹到不知所謂，令紅軍成為最大受害者，搞到羅渣士火都嚟埋，英格蘭足總確要認真檢討球證水準問題。

今晚又有場“四大”混戰，由出晒名火爆教頭老摩領軍嘅車路士，對住仲未降火嘅羅渣士帶隊的利物浦。如果今場執法判官再有任何差錯，肯定畀人“插”到開花。

老摩上場對阿仙奴被“槍迷”鬧爆打烏龜戰術冇出色，但實際上老摩嘅突撃部署相當奏效，而且非常到肉，若非林柏特射門中楣，車仔已經先開紀錄。要怪嘅依然係前線死晒火，上仗一球險勝史雲斯，過氣射手伊圖再三番四次錯失良機，老摩真係睇到擰晒頭。不過全場有十九次攻門總算大有改善，只要今仗加強埋門把握力，車仔仍有勝算。

紅軍上仗敗於曼城腳下，整體發揮的確唔差，完全踢出強隊本色，話輸畀“昏哨”並非誇大，最驚士氣受挫，唔多唔少受到一定影響。加上作客成績一般，今仗對紅軍唔抱太大期望。初盤車路士讓平手／半球，推介近九個主場取得八勝一和嘅車仔可獲“利”。

推介：車路士2:1