熱刺排“紅”
利物浦雖連續兩場大炒對手,但都祇係下游球隊諾域治與韋斯咸,根本所受威脅唔大。再睇返近四場的作客比賽,兩和兩負未贏過,今晚作客具一定實力嘅熱刺,實在對紅軍毫無信心。初盤開出祇係平手,簡直筍盤到爆,一於捧熱刺有“利”可圖。 連埋歐霸盃,熱刺近五戰取得四勝一和,球員狀態保持得相當穩定,最大改善係前線火力明顯得到提升,近五場共攻入十二球,蘇達度上場更連中三元,入球信心返晒嚟,仲有艾歷臣與丹尼羅斯已傷癒復出,強陣出擊料可殺退紅軍。 利物浦今季如此神勇全靠“牙擦蘇”,雖頭五場坐波監,但踢十場波共入十五球,做埋射手榜一哥,的確又抵佢牙擦。不過,另一重心“謝隊”與史杜列治因傷缺陣,“牙擦蘇”今仗幾難單天保至尊。 推介:熱刺2:1 |