兵工廠闖“卡”

兵工廠闖“卡”

今季升上英超嘅威爾斯球隊卡迪夫城成為曼市剋星，繼在自己地頭殺敗曼城後，上周聯賽又逼和曼聯。主場氣勢的確夠晒震撼，球隊打法話之你強隊抑或二線分子，一於同你鬥攻鬥搶，絕不會死守坐以待斃。今晚迎戰榜首嘅阿仙奴，相信仍會與一班“槍手”全面駁火。

咁就啱啦！阿仙奴班波最驚你唔攻，因為睇過兵工廠好多場比賽，反而對住保守踢法嘅球隊，顯得老鼠拉龜無從入手，卡迪夫城“開放式”踢法，對兵工廠更加有利。初盤阿仙奴讓半球／一球，可搏兵工廠攻陷“城”池，至少可執半個盤。

卡迪夫城上仗能夠在完場前逼和曼聯都算夠運，最主要係一班“魔星”表現在水準之下，尤其前線多次失機，否則卡迪夫城肯定三分全失。今晚對住近況穩定嘅阿仙奴，卡迪夫城勢難以升“仙”。

自“大眼仔”奧斯爾加盟後，確令兵工廠踢出生氣，連韋舒亞、基奧特、法米尼及艾朗藍斯等個個踢到上晒身，中前場組織配合越踢越悅目，侵略性極強，要攻破卡迪夫城脆弱防線，應該不成問題。為要繼續保住領先優勢，阿仙奴誓必全取三分。

推介：阿仙奴1：0