阿特蘭大迫和國米

阿特蘭大迫和國米

雖然今季國際米蘭致力年輕化，而且季初仲立即殺入前列，但係作客依然都係死症；前晚國米作客阿特蘭大喺一度領先之下遭到追平，最終只能夠同對手踢成1:1平手，已經連續3次作客都係和波收場，下輪作客烏甸尼斯有排煩！
今次國米作客阿特蘭大可以話係派出強陣，除咗貝科迪爾上場領紅而需要停賽之外，其餘嘅柏拉斯奧、古亞連、列卡度艾華利斯、長友佑都等人全數都喺正選名單當中。人強馬壯嘅國米去到16分鐘就憑住列卡度艾華利斯先開紀錄，可惜相隔9分鐘就俾對方嘅丹尼斯追成1:1平手，打後雙方都無辦法拉開紀錄。
值得留意嘅係，完場之後雖然國米仲係排喺意甲前列，但係10輪意甲和足4場，尤其係作客3連和，睇嚟成班新人都仲未好識應付客場賽事，今個禮拜日晚作客烏甸尼斯隨時又會失分。