加泰鬼盤難“包”
跟住巴塞激戰皇馬,又係一場高水準比賽,呢兩支“世仇”都施展渾身解數,殺得相當激烈,真係捱眼瞓都抵。 講開西甲,今晚有場獨腳戲應該都幾刺激,由第五嘅加泰對第六嘅畢爾包;不過,今日齋講唔推介,因為場波有啲唔對路,大家不妨留意吓。初盤開出係平手,小弟就覺得有啲古怪;第一,加泰排名高過畢爾包;第二,加泰佔有主場之利,開季四場三勝一和保持不敗,而畢爾包作客成績甚差;第三,講近況狀態,加泰“弗”到“嘭嘭聲”,一定好過對手畢爾包,近六戰取得五勝一負,只係作客輸畀皇馬。 此外,上季對賽加泰亦雙殺畢爾包,以上種種因素加泰都明顯佔優,但竟然唔使讓波,你話古怪唔古怪,大大隻老鼠通街行就見得多,咁大隻蛤乸隨街跳真係好少見,所以奉勸各位投資者確要三思而後行。 |