皇馬落飛趁“祖”

皇馬落飛趁“祖”

皇馬在歐冠盃分組賽兩戰兩勝，要殺入十六強應該問題不大；當然，搶足分數十拿九穩最實際，今晚第三戰在主場迎戰祖雲達斯，贏埋更可以坐定粒六等出線，而且踢波幾時都要講氣勢，落到場邊個想輸？周六晚將與死對頭巴塞大戰，為加強士氣，今仗必會全力爭勝。

祖雲達斯頭兩戰只能摸和對手，要出線確要加把勁，但面對強勁的皇馬，搶分實在不易，唯一優勢近四次對賽皆能獲勝，只不過係多年前的事。初盤皇家馬德里硬讓一球屬筍盤，火力十足的銀河戰艦要贏兩球唔難，有買趁早。

皇馬雖然放走奧斯爾，但進攻點依然殺食，尤其兩邊側擊，迪馬利亞近期“弗”到爆，箭頭摩拉達亦開始上位，C朗更加毋須多講，加上巴利復出，祖記防線的確有排愁。

祖記後防近期實在慘不忍睹，上場聯賽對費倫天拿失四球簡直錯漏百出，近三場比賽共失八球，以往銅牆鐵壁防線變成山泥傾瀉，確要認真檢討；此外，安帥對祖記踢法應該心中有數，帶住強大的皇馬又點可以失禮班鄉里。推介：皇家馬德里3:1