槍手征“西”有危機

槍手征“西”有危機

一向睇開雲格在場邊領軍都係愁眉深鎖，不過，呢期應該開心晒，聯賽幾耐未試過坐頭位，暫時可以過吓榜首癮，歐冠盃又贏完再贏，順起上嚟真係有條路，但要繼續保住一哥位，當然要仍需努力，始終革命有排都未成功，阿仙奴今晚作客西布朗，唔好以為去到“山楂”球場就好易食，呢支估佢唔到的雜牌軍球隊，隨時唔聲唔聲又嚇你一驚，“雲總”確要小心！小心！

西布朗上場反轉奧脫福，二比一激殺曼聯，搞到莫耶斯面目無光，西布朗到底贏乜呢？除了鬥心加拼勁外，就係毫無壓力，輸係應該，贏係光彩，打不死精神就係最大能量，今仗更加有主場“粉絲”撑場，打加一波情況下，有力與槍手一拼，初盤阿仙奴讓半球／一球，推介西布朗主場頂得住。

西布朗能夠做低曼聯唔好話“符碌”，睇返賽後統計，射門、控球及角球等方面只係相差無幾，證明西布朗在進攻與防守都有計劃性去部署，如果阿仙奴當呢班波只係“二打六”，分分鐘又中招。

無可否認自從“大眼仔”加盟阿仙奴後，成隊波龍精虎猛，更恐怖係幾乎每個入波都與“大眼仔”有關，睇吓西布朗如何作出針對性“反眼”行動。

推介：和波1:1