曼城“愛”唔過

曼城“愛”唔過

曼城在歐冠盃主場慘遭羞辱，一比三不敵拜仁，繼聯賽輸畀維拉後，兩場波共失六球，防線再次醜態百出，身為一支爭標勁旅竟有如此極大致命傷，真係成何體統？一而再、再而三，睇怕短時間內後防難有改善。

辦法未諗掂，氣都未唞完，曼城今晚又要出戰，在英超早場迎戰今季未輸過的愛華頓，以曼城目前狀況，等於一隻冇牙老虎。愛華頓一向有硬骨頭之稱，當冇牙老虎遇上豬頭骨，呢隻老虎整定唔好彩。

單計往績，愛華頓真係驚都未驚過，近八次對賽，愛華頓贏六場，和一場只輸得一場，心理上已經稍為佔優，話之你班球星有幾高身價，有幾大名氣，總之隻揪隻，唔驚你大隻。初盤曼城讓半球／一球，一於捧愛華頓可以逃出“城”門。

曼城輸畀拜仁應該輸得心服口服，控球指數只得三成，射門次數亦少拜仁一半，基本上處於捱打，難怪連英格蘭第一號門神都踢到“騰晒雞”，今戰唔好講曼城鋒線有幾厲害，顧住條防線先講。

愛華頓戰鬥力雖然唔及幾支爭標豪門強大，但呢班波真係鬥心十足，戰意旺盛，爛打又爛搶，曼城今晚必會陷於苦戰。

推介：和波2:2