拜仁必有攻“城”計

拜仁必有攻“城”計

今夏有幾位名帥因大執位曾經成為熱話，到目前為止有幸有不幸，曼聯的莫耶斯已經危機重重，皇馬的安帥與重返車仔的“寸王”唔好得好多，最威水係巴塞的馬天奴，捧完西班牙超級盃後戰無不勝，可以畀十個“叻”呢位教頭。

曼城上場聯賽輸波後，“柏蛇”都要好自為知，尤其在歐冠戰績，如果分組賽出唔到線，隨時執包袱走人。今晚對住上季冠軍的拜仁慕尼黑，“柏蛇”排陣真係進退兩難，脆弱防線已成為球隊最大致命傷，能夠搶得一分，應該可以還得神落。

同樣首度執教拜仁，哥帥並不失禮，至少已經捧個歐洲超霸盃，德甲又與多蒙特並列榜首，有料即係有料，今晚再遇老對手又點衰得。“柏蛇”之前在西甲執教時，與哥帥亦有些少牙齒印；不過，呢個世界無永遠敵人，奧巴馬都同魯哈尼煲電話粥啦，最緊要贏波才是最實際。

曼城頭重尾輕，前線有足夠火力與拜仁對攻，但後防的確危機四伏，對住維拉二三線的攻擊手都可以失三球，面對列比利與洛賓的雙翼齊飛，及機會主義者的文迪蘇傑，實在難保不失，初盤拜仁讓平手／半球，依然睇好拜仁可以破“城”。

推介：拜仁慕尼黑3:2