曼市風暴勁過天兔

曼市風暴勁過天兔

超級颱風“天兔”今日殺到，十號風球隨時高掛，打風最佳娛樂，莫過於安坐家中睇打波，尤其今晚英超有場重量級大戰，曼城火倂曼聯展開曼市大格鬥，激戰當前又點可以放過，“天兔”都要吹埋一邊。

兩隊近八次交手都分出勝負，各贏四場，而且仲係“單跳”，你贏一場我贏一場，上次曼城贏波，唔通今次又輪到曼聯？無論如何，證明雙方戰力的確勢均力敵，勝負實在難料，初盤有主場之利的曼城讓平手/半球，必揀揸住半個盤着數的曼聯。

兩隊真係難兄難弟，開季戰績一樣，四場聯賽同得兩勝一和一負，已經失咗五分。周中歐冠盃分組賽齊齊報捷，同樣加強今戰爭勝決心。當然，曼城在自己地頭出擊，肯定踢得比較主動及積極，但唔好忘記，曼聯打大戰真係打到“滑晒”，之前亦與“車仔”及“紅軍”利物浦交手，雖只係一和一負，但依然踢出本身強隊風格，反而曼城輸畀卡迪夫城，悶和史篤城就失禮得多，連埋對柏辛域陀尼亞的歐冠比賽，今季曼城根本仍未遇上真正強手。

點都好，唔係你死就係我亡，呢場火藥味十足的大戰，和波機會相當高。

推介：和波2:2