車仔抗“咸”潮振聲威

車仔抗“咸”潮振聲威

有“寸王”之稱的摩連奴今季重返“車仔”聲勢浩大，揚言再度帶領球隊衝上雲宵。不過，近兩場比賽一輸再輸，最慘連一向帶隊主場戰績彪炳的威勢都輸埋，寸王不但面目無光兼口黑面黑，睇怕亦要封嘴收聲。為要挽回面子，今晚再度主場出擊，迎戰同市的富咸，再唔大勝一場沖喜，油王肯定發炮“詐型”。

富咸開季至今一樣“也也嗚”，四戰只得一勝一和兩負，聯賽盃亦幾乎輸埋畀低組別球隊，可想而知球員狀態仲差過一班“車手”。況且球隊出名欺善怕惡，今晚撞正急需反彈的車仔，富咸實屬螳臂擋車。初盤車路士硬讓球半，信寸王有計可以扭轉頹勢，捧車仔贏波又贏盤。

主場不敵巴素利，車仔十年金身被打破，因為車仔在歐冠盃分組賽最近一次主場輸波，就係○三年輸畀土耳其球隊比錫達斯。更令寸王冇面嘅係重返車仔的第一場歐冠，所以今戰對富咸唔可以再度失威。一班車手同樣要為自己嘅聲譽而戰，只要發揮水準及爭勝決心，車仔仍係勝算較高。

富咸人腳其實唔差，只可惜整體戰意令人感覺不足，實在令捧場客失去信心。推介：車路士3:0