紫百合主場炸“蜢”

有“紫百合”之稱的意甲勁旅費倫天拿，今季的確值得各位波迷留意，因為開季前大手入貨，加入多名高質兼具名氣球星，擺出要爭取佳績決心。除意甲聯賽外，歐霸盃亦係重點之一，明日凌晨附加賽次回合主場再戰瑞士名牌強隊草蜢，整體人腳明顯優勝的費倫天拿料可再一次擊倒對手。

草蜢在上季瑞士超級聯賽奪得亞軍，有機會參戰歐冠盃外圍賽，可惜“兩招了”，被法甲勁旅里昂淘汰出局，唯有次一級踢歐霸，但又抽中對費倫天拿，整定唔好彩，首回合主場已失利，今戰仲要淨勝兩球才可翻身，確實難度極高，初盤費倫天拿硬讓一球，推介“紫百合”輕鬆拔“草”。

費倫天拿今季雖有祖維迪過檔曼城，但加入馬里奧高美斯、伊歷錫、祖昆、岩布仙尼及M艾朗素等具級數球員，實力比上季有增無減，特別前線攻擊力，羅斯仔傷癒復出即有“士哥”，狀態不成問題，拍住新拍檔馬里奧高美斯及中場策劃者大衛比沙路，呢個攻擊鐵三角威力絕不簡單，要攻破防守力一般的草蜢，至少入兩球唔難。

由於首回合落後一比二，草蜢今仗非攻不可，問題只係能力範圍，所以期望唔大。

推介：費倫天拿3:0