紅魔受讓有“利”

早兩日英格蘭聯賽盃抽籤，“雙紅會”利物浦撞曼聯成為焦點，不過呢場波要去到九月尾才開戰。講真句，聯賽盃有幾重要吖！聯賽對陣，兩隊更加真材實料。利物浦以聯賽兩連勝氣勢，今晚坐鎮晏菲路球場恭候紅魔駕臨，展開“紅色”廝殺，初盤開出利物浦讓平手／半球，近三次對戰，紅軍輸足三場，證明紅軍近年戰力明顯下降。紅魔在英超依然站於龍頭地位，利物浦又何來讓得起曼聯？

紅軍開季有個好開始，先焚史篤城再斬維拉，如果今晚能夠驅“魔”全取三分，更可升上聯賽榜一哥位置，數下數下都唔知幾耐未坐過呢個位，今仗肯定打甩髀。但睇返兩場波表現，紅軍都係贏得較為驚險，特別對維拉一戰，全場只得一次中目標攻門，亦成為唯一入球，劣勢下贏波認真好彩。至於聯賽盃仍以大半隊主力出擊情況下，在加時階段才能淘汰英甲級別的諾士郡，查實有冇火力挑戰紅魔？

曼聯上仗與“車仔”悶戰一場，但睇到解除禁令的朗尼在場上表現，確對球隊前線起到好大作用。只要雲佩斯與韋碧克交出水準，數糊能力及贏波本錢肯定多過利物浦。推介：曼聯2：1