巴塞讓兩球有暗湧

近年西甲只有巴塞羅那與皇家馬德里兩大豪門獨大，其他球隊只係陪太子讀書，爭到第三、第四已經開心到不得了。馬拉加呢兩季都算叻過下，排名在前列當中，屬實力分子，可惜今季有半隊主力離隊，整體戰力無疑削弱，唯有靠拼勁去爭取佳績。尤其今晚對巴塞，除靠主場優勢外，更要提升鬥心，希望將距離拉近。

巴塞首場聯賽以狂風掃落葉姿態，大炒利雲特七蛋強勢開咧，不過，周中西班牙盃卻係苦戰一場，勉強逼和馬體會，重心美斯更加因傷離場。雖然平均戰力依然在對手馬拉加之上，但踢作客始終減兩成威力，讓得多實在唔化算。留意到初盤開出硬讓兩球，跟住轉盤讓球半／兩球，如此走勢暗藏殺機，巴塞隨時贏波輸盤。

馬拉加今季有伊斯高、杜拿蘭、盧根奴、祖亞昆及迪米捷利斯等主力離隊，戰力至少唔見一半。但爛船都有三斤釘，辛達告魯斯、波迪路、費蘭迪斯及伊利斯奧等依然頂得兩嘴，有力與巴塞一拼。巴塞季初就要應付密集式賽程，打完今仗過兩日又要爭西班牙盃，新任教頭馬天奴料會集中於首個錦標，馬拉加有機可乘。推介：和波：1：1