曼聯讓波“蘇”唔過

曼聯讓波“蘇”唔過

曼聯今晚將會踢季前最後一場熱身賽，遠赴瑞典與當地聯賽爭標分子AIK蘇納拍跳，由於周日要與韋根爭慈善盾，新一季英超又即將開鑼，避免球員有任何損傷，避重就輕兼搏殺程度不足情況下，紅魔要讓波實在不宜追捧。

瑞典超級聯賽已經進入次循環階段，AIK蘇納目前穩守聯賽前三位，有機會爭奪聯賽錦標，球隊狀態“弗”到爆，近十戰取得八勝兩和不敗佳績，證明並非三教九流之輩，今仗更佔有主場之利，預料可與曼聯拉成均勢，坐和望贏。

能夠站穩聯賽前三甲，AIK蘇納實力的確唔差，前線有一對非洲組合，加納的卡利卡利與尼日利亞的伊邦蘭尼基，兩位仁兄步大力雄兼衝刺力強，仲有曾經在西甲搵食的哥度姆，確有能力威脅紅魔大門，中後場亦有哥斯達尼加國腳波格斯，加埋曾踢過英超布力般及拜仁的祖漢臣，有前有後，對住留有餘地的曼聯應該冇得輸。

曼聯有韋迪、“小豆”及蘭尼歸隊，亦有朗尼傷癒復出，陣容逐漸完整，但今仗只屬“應酬”性質，最緊要應付嚟緊正式比賽，今仗最好以和為貴。

推介：和波2：2