拜仁爆“列”

拜仁爆“列”

“無記”今晚有場德國盃直播，由一支德國北部地區球隊仔叫做列頓，對德甲班霸豪門球會拜仁慕尼黑，簡直屬於一場超級越級挑戰，又等於一場幼稚園打大學生比賽，基本上爆冷可能性係零，只係睇拜仁最終可以數幾多球。

德國聯賽分為甲、乙、丙三個組別，列頓只屬於德國北部地區聯賽其中一支球隊，即係話同拜仁的確差幾班，有幾多實力都無需分析，打肯定冇得打。只不過，唔好以為列頓抽中對拜仁係慘事，場波預咗任“仁”蹧躓，但廣告費、門票收入，再加電視直播費，真係分紅都分到笑，以一支業餘球隊仔計數，今場波分紅隨時夠幾年班費。所以話，又可以與世界級球星較技，又有筆大收入，輸十球八球又如何。

由於班數有別，預料哥帥只會半力出擊，但何謂半力呢？以拜仁目前超級班底，正副選根本無太大分別，球員個人技術與質素，個個都有一定份量。聯賽未正式開戰，哥帥已帶領球隊贏得“小三冠”，奪得三個友誼盃賽冠軍，卻失去較為重要的德國超級盃，如果今仗連低組別球隊都打唔贏的話，實在難向球迷交代，唔過五球唔收貨。

推介：拜仁慕尼黑6:0