拜仁手到“那”來

拜仁手到“那”來

今日真係好波停不了，有東亞盃男、女足，隔籬埠有亞洲英超賽上演，美洲金盃又有四強決戰。最吸引當然係漢尼斯盃，由歐洲兩大頂級球會拜仁慕尼黑對巴塞羅那，而且“香港良心”台有得直播，相信球迷一定唔會錯過。

拜仁今年橫掃歐洲球壇，三冠王之後依然狂風掃落葉，開操至今七戰七勝，場場數三球或以上，啱啱又捧完個電訊盃，真係捧盃都捧到手軟，原因球隊確實人強馬壯。今仗賣點係哥帥領軍拜仁決戰舊東家巴塞，仲有啱啱過檔的A泰亞高，加上本身豪華陣容，拜仁可以睇高一線，更何況哥帥對巴塞踢法瞭如指掌，開晒馬力的拜仁料可再次擊倒對手。

歐冠盃兩回合慘敗拜仁腳下，證明巴塞“地上最強”已經被拜仁取代，雖然今季有尼馬加盟，與美斯組成恐怖鋒線，但美尼組合是龍是蛇亦需要時間見證，至於其他位置上變動不大，好處係默契配合唔成問題，不好之處係欠缺新意，更蝕章今仗係開操後第一場熱身，球員狀態與上力程度肯定不及拜仁。

推介：拜仁慕尼黑4：2