世青盃熱門之選

世青盃熱門之選

U20世青盃決賽周經已展開，由於“口靚仔波”表現比較飄忽，要揀邊隊成為奪標熱門確實言之過早，一來只能透過精華片段，才能睇到一班明日之星發揮如何，二來各國足球青訓實在轉變太大，例如以往青訓計劃相當完善嘅足球強國，在今屆世青盃無影無蹤，包括巴西、德國、荷蘭及日本等。

如果要揀，心目中有四隊，首選歐洲“雙牙”——西班牙與葡萄牙，“小紅牛”首戰打到“美國仔”全無還擊之力，證明世界排名第一並非浪得虛名，完全踢出大國腳風範。

葡萄牙青訓一向“有料到”，上屆決賽加時輸畀巴西屈居亞軍，今屆捲土重來，的確值得留意。

大家不妨目及實墨西哥，兩年前在U17世少盃呢班墨西哥小將勇奪冠軍，兩年來一直保持原班人馬，從不間斷繼續歷練，三月份更加擊敗美國奪得中北美洲冠軍，絕對可以成為今屆世青盃頭號黑馬。

既然南美洲冇巴西與阿根廷，唯有揀烏拉圭，因為講青訓，烏拉圭在南美數一數二，甚至比巴西更見成效。值得一提的是，呢班就係兩年前世少盃輸畀墨西哥嘅亞軍球隊。