Mic少：意軍當克撐對家

歐洲國家盃外圍賽戰火重燃，今晚即上演重頭戲，H組克羅地亞主場對意大利。意軍遇「克」星，認真冇運行，雙方史上7次交鋒，堂堂4屆世盃冠軍意大利竟然未嘗一勝，呢股「克氣」更蔓延至球會級賽事，克羅地亞中場拿傑迪錫剛於歐聯決賽射死祖雲達斯，更加唔好彩係門將保方受傷，今仗上陣成疑，令以祖記人腳為骨幹嘅意大利大受打擊，恐怕無力破宿命，克羅地亞讓平半捧上盤。

（有線61及201台周六凌晨2時45分直播）

「格仔兵」克羅地亞自91年獨立以來，成為意大利最大剋星，兩隊首次對壘正係94年歐國盃外圍賽，當時意軍主場輸1比2，噩夢從此開始，02年世盃又以同樣比數落敗，12年歐國盃分組賽領先下，被克國逼和，今屆外圍賽首循環主場都係贏唔到，總共7次交手，意大利錄得4和3負劣績。

克羅地亞夫添 意國爆傷兵潮
意大利現時仲爆發傷兵潮，新紮射手施蒙尼沙薩、中場迪羅斯、馬高華拉堤同後衞巴沙利已因傷退隊，門將保方亦有傷在身上陣成疑，領隊干地肯定頭痕。由於意軍以祖記球員為核心，派路、馬治斯奧、邦路斯剛失落歐聯錦標，身心受打擊，未必回到氣，令情況更惡劣。

克羅地亞人才濟濟，除咗大家熟悉嘅文迪蘇傑、奧歷之外，拿傑迪錫亦具數級，仲啱啱喺歐聯決賽入波，鴻運當頭。後備席上仲有協助迪尼普打入歐霸盃決賽嘅前鋒卡連歷，中前場人腳鼎盛，即使保方頂硬上，都未必保得住後方。另外，克羅地亞仲有多位球員喺意甲搵食，包括兩位國米中場高華錫、波索域，以及費倫天拿中場巴迪積，對意大利球員能力瞭若指掌，就算皇馬中場莫迪歷養傷，都有力再食「意粉」。