Mic少：小森巴搵烏拉圭祭旗

優質新星個個識數胡
今日世青盃16強最矚目之戰，肯定係兩支南美勁旅硬撼，巴西U20對烏拉圭U20！阿根廷出局後，巴西奪冠呼聲愈來愈高，呢支「小森巴」表現對辦，今屆3戰3勝合共轟入9球，有姿勢更有實際。烏拉圭雖然係上屆亞軍，但人腳面目全非，今屆演出亦未如理想，恐怕係時候行人止步，簡單要巴西U20主W。

（周四下午3時30分開賽）

巴西貴為「足球王國」，各年齡級別國家隊實力都屬於世界第一流水平，今次出戰U20世青盃，大軍名單不乏優質新星，包括曼聯中場安達斯彭利拿、馬賽中場艾夫、布拉加後衞丹尼路巴保沙，以及10號仔加比爾捷西斯。個人技術出眾之餘，整體戰亦佳，入球分別由7人攻入，個個都有數胡能力，令對手防不勝防，晉級機會樂觀。

烏拉圭U20第1場僅小勝塞爾維亞1比0，之後仲輸畀同組包尾嘅墨西哥，表現令人失望。去到最後1場分組賽更同馬里大踢「默契波」，打和一齊出線，完全不思進取，反映球隊能力有限，唔敢冒進。今仗遇上巴西，先至係真正考驗，恐怕難逃一敗，巴西主Ｗ有1.7倍真係趁早買。

葡萄牙猛轟新西蘭
同時間另一場16強大戰，小組3戰全勝嘅葡萄牙攻力比巴西更犀利，已有10球進帳，對住東道主新西蘭U20殺無赦，直取讓球客勝。