烏拉圭“尼”料

烏拉圭“尼”料

B組西班牙打入四強應該毫無懸念，大溪地諗都唔使諗，另一席位就由尼日利亞與烏拉圭相爭，明早兩雄相遇，兩隊只能活一隊，必定殺得天昏地暗。

尼日利亞上仗玩轉大溪地，真係練波咁練，真正實力有幾多的確未睇清。不過，曾經被大溪地攻過一輪，十次射門四中目標，反映出“非洲鷹”的防線穩陣程度有一定問題。至於可以攻入六球，只係對手防線錯漏百出才有機可乘，今戰對住實力強得多的烏拉圭，尼日利亞將受到真正考驗。

一比二不敵西班牙，烏拉圭非戰之罪，但要確保出線資格，今戰必須全力爭勝。以人腳平均質素及大賽經驗，加上半個主場之利，烏拉圭有望打開勝利之門。初盤烏拉圭讓半球，捧硬“烏軍”可獲“利”。

洲際盃八隊中，尼日利亞係最年青一隊，大部分球員都係二十出頭，只有米基與阿克柏拉最具經驗，所以對住身經百戰的一班烏拉圭球星，尼日利亞已經輸蝕。有蘇亞雷斯、卡雲尼、干沙里斯及科蘭等攻擊手，烏拉圭確有一定贏波本錢，今仗誓要圍攻對手形勢下，必有斬獲。

推介：烏拉圭2:0