墨西哥受讓值博

墨西哥受讓值博

森巴兵團首戰盡顯東道主氣勢，以三球輕取“日軍”，今晚再度出擊，迎戰中北美洲冠軍墨西哥，誓要取得連勝提早殺入四強。不過，墨西哥並非善男信女，去年奧運男足決戰，墨西哥力挫巴西奧運隊奪金，兩隊大國腳舊年六月同樣在中立場踢過友誼賽，墨西哥以兩球戰勝“黃衣戰士”。人腳方面，同今晚交戰基本上原班人馬，雖然踢波逐場計數，但巴西要報兩敗之仇？唔係咁易囉！初盤巴西讓一球/球半，首仗輸波的墨西哥非要搏命不可，全力掃“黃”的“墨軍”至少可執半個盤。

睇返巴西贏日本數據，巴西唔係佔太多優勢，中門次數反而日本仲多過巴西一次，森巴兵團的確贏在前線攻力夠銳利，埋門把握確實優勝得多，最重要早段開紀錄，打亂“日軍”部署，但面對墨西哥唔同風格踢法，就要打過先知。

墨西哥輸畀意大利輸在先守後攻，整體嚟講踢得唔差，始終呢班波合作性相當強，沙斯度、古亞達度、拖拉度、洛迪古斯、杜斯山度士及靴南迪斯在國家隊合作無間，有力與巴西一決高下。

推介：和波1:1