小英軍必攞“威”

小英軍必攞“威”

英格蘭U21代表隊首戰出師不利，在U21歐國盃一球不敵意大利，要殺入四強打後兩戰絕對不容再失，尤其今晚對住實力較弱的挪威，確要步步為營穩中求勝。

挪威第一場真係“執返身彩”，對主辦國以色列完場前逼和對手搶得一分，對出線仍存在一絲期望；不過，過到初一未必過到十五，對住打親都輸的英格蘭，睇怕挪威難逃一敗。初盤英格蘭讓半球—一球，非勝不可的小三獅兵團可值博。

今次英格蘭U21陣中確有唔少具潛質球員，除亨達臣、哥爾卡、丹尼羅斯及舒爾維已開始打響名堂外，下季重返曼聯的沙夏、前阿仙奴小將蘭斯貝利等，都係後生可畏，平均人腳無疑優於今仗對手挪威，可惜上場對意大利發揮較為拘謹，可能“口靚仔波”問題，但今戰必搏形勢下，去到盡值得捧場。

挪威陣中亦有多名球員在其他歐洲聯賽效力，只不過屬三四流球會，水準亦比較低，當然不及英超。兩隊U21歷史中五次交手，挪威輸足五埸，包括今屆外圍賽兩次碰頭，真真正正係英格蘭的手下敗將。只要“小三獅”發揮正常，應可穩勝。

推介：英格蘭2:0