走肖：熱刺曼城射手大鬥法

熱刺今晚喺英超主場對曼城，形勢上兩隊都要搶分，當中熱刺想踢歐霸盃，「藍月亮」要保住歐聯席位，睇怕肯定打甩髀，況且熱刺超新星哈利卡尼喺英格蘭球員先生選舉，獲選最佳新秀後首次出戰，對家曼城有王牌阿古路同佢爭金靴獎，鬥騷哥利要開1.54倍入球大唔難。

（now621台周日晚11:00直播）

現時熱刺同第5位嘅利物浦同分，想踢歐霸盃要睇路至得，而最近腳風回落嘅哈利卡尼，相信獲獎後會重新上力，特別係熱刺喺首循環作客以1:4慘負畀曼城，當時佢冇咩表現，今次再遇肯定唔想再衰，應該可以借得獎旺氣入波威番吓。

耶耶托尼打柴影響大
另一方面，曼城放唔甩阿仙奴同曼聯，為咗確保前4名身份過終點，作客一樣要搏盡。仲有呀，阿古路今季喺聯賽攻入21球，只係多哈利卡尼1個士哥，佢想登上英超神射手寶座，就更需要喺熱刺身上搵着數，事關首循環佢食出大四喜，今場肯定嗒晒糖。

仲有就係，上個禮拜「藍月亮」喺主場以3:2險勝阿士東維拉一役入面，球隊靈魂耶耶托尼又傷，今場肯定唔使預，要知道呢位科特迪瓦國腳喺曼城嘅重要性極高，佢先後26次喺英超缺陣，班波只錄得13勝10和3負，勝率跌到得50%，意味「藍月亮」今場要贏波絕對唔容易，想搶分梗係要的起心肝鬥攻啦！

周日賽制
荷盃：今輪為決賽。比賽1場決勝負，若法定時間內打和則進行加時，再和即互射12碼分高下。

巴省聯：今輪為決賽次回合賽事。若總比數打和，不會計算作客入球優惠，並於次回合法定時間後即射12碼定生死。